Սահմանին զոհված զինծառայողների հուղարկավորությունների ժամանակ ծնողները թույլ չեն տվել ներկաներին լացել՝ նշելով, որ իրենց զավակները հերոսներ են, իսկ հերոսների մահը սուգ չէ։ Այս մասին այսօր՝ սեպտեմբերի 18-ին, ԵՊԲՀ կատարած այցի ժամանակ ասաց պաշտպանության նախարար Սեյրան Օհանյանը՝ մեկնաբանելով հուլիս-օգոստոս ամիսների լարվածությունը։
«Այս տարին կարեւոր է նաեւ այն առումով, որ մեզ պարտադրեցին լարվածություն շփման գծում։ Հակառակորդը փորձում էր լարվածություն ստեղծել, շատ տարածքներում նա դա ստեղծեց։ Հակառակորդը զերծ չմնաց կրակոցներից, դիվերսիոն գործողություններից։ Մենք տեսանք, թե բանակն ինչպես կարողացավ դրսեւորել։ ՀՀ պաշտպանության նախարարությունն ու ԼՂՀ պաշտպանության բանակը կարողացան դադարեցնել հակառակորդի այն գործողությունները, որոնք բերում էին մարդկային կորուստի։ Այս տարվա ընթացքում շատ հուղարկավորությունների ժամանակ շատ ծնողներ մեզ նույնիսկ արգելեցին լացել, որովհետեւ նրանք ասում էին՝ մեզ համար սա ոչ թե սուգ է, այլ հերոսություն։ Մեր տղաները բարձր պահեցին մեր մարտական ոգին, ինչպես նաեւ ստեղծեցին իրավիճակ, երբ մարդիկ, մի կողմ դնելով իրենց քաղաքական հայացքները, համախմբվեցին բանակի շուրջ»,- ասաց նա։
Հիշեցնենք, որ հուլիսին վերջին եւ օգոստոսի սկզբին ադրբեջանական կողմը շփման գոտի դիվերսիոն ներթափանցման մի շարք փորձեր էր ձեռնարկել, սակայն բոլոր դեպքերում հակառակորդը հետ էր շպրտվել: Պաշտոնական Բաքուն հայտնում էր ավելի քան 26 զինծառայողների մահվան եւ երեք տասնյակի վիրավորման մասին: Օգոստոսի տասին Սոչիում տեղի ունեցած եռակողմ հանդիպումից հետո միայն լարվածությունը սահմանին թուլացել է: