Վարչապետ Հովիկ Աբրահամյանն ընդունել է Քուվեյթի խորհրդարանական պատվիրակությանը՝ հայ-քուվեյթյան խորհրդարանական բարեկամության խմբի ղեկավար Ֆեյսալ Ֆահդ ալ-Շայիի գլխավորությամբ: Ողջունելով հյուրերին կառավարությունում՝ վարչապետը կարեւորել է հայ-քուվեյթյան հարաբերությունների զարգացումն ու ընդլայնումը: Ընդգծելով երկու երկրների միջեւ առկա ջերմ կապերը՝ Հովիկ Աբրահամյանը նշել է.«Հայաստանի կառավարությունը շահագրգռված է երկկողմ առեւտրատնտեսական կապերի ընդլայնման եւ տարբեր ներդրումային ծրագրերի իրականացման գործում: Այդ նպատակով՝ պատրաստ ենք քուվեյթյան կապիտալի համար ստեղծել բարենպաստ ներդրումային պայմաններ»:
Ֆեյսալ Ֆահդ ալ-Շային Հովիկ Աբրահամյանին է փոխանցել իր երկրի վարչապետի ջերմ ողջույններն ու Քուվեյթ այցելելու պաշտոնական հրավերը: Հայ-քուվեյթյան խորհրդարանական բարեկամության խմբի ղեկավարի խոսքով՝ երկկողմ փոխայցելությունները նոր թափ կհաղորդեն հայ-քուվեյթյան համագործակցության հետագա ընդլայնմանը: Ֆեյսալ Ֆահդ ալ-Շային ընդգծել է առեւտրատնտեսական կապերի զարգացման գործում իր երկրի շահագրգռվածությունը եւ այդ առումով կարեւորել Հայաստանի եւ Քուվեյթի առեւտրաարդյունաբերական պալատների միջեւ համագործակցության սերտացումը, բիզնես ֆորումների կազմակերպումը:
Զրուցակիցները համոզմունք են հայտնել, որ առկա է համագործակցության մեծ ներուժ գյուղատնտեսության, արդյունաբերության, զբոսաշրջության եւ այլ բնագավառներում: Երկուստեք կարեւորվել է ուղիղ ավիաչվերթների կազմակերպումը:
Ֆեյսալ Ֆահդ ալ-Շային նշել է նաեւ, որ Քուվեյթը պատրաստ է իր աջակցությունը ցուցաբերել Նոր Հալեպ թաղամասի կառուցման աշխատանքներին:
