ՀՊՃՀ ռեկտոր Հովհաննես Թոքմաջյանի գործը դեռ գտնվում է նախաքննության փուլում: Այս մասին այսօր՝ սեպտեմբերի 18-ին, լրագրողներին ասաց Ոստիկանության կազմակերպված հանցավորության դեմ պայքարի գլխավոր վարչության 3-րդ վարչության պետ, ոստիկանության գնդապետ Տիգրան Պետրոսյանը:
«Մեր կողմից ստացված հաղորդագրության հիման վրա նախապատրաստվել են նյութեր, հարուցվել է քրեական գործ: Բոլոր հարցերի պատասխանը կտրվի միայն փորձաքննությունից հետո»,-ասաց նա: Նրա խոսքով՝ բացատրություն է վերցվել նաև Հովհաննես Թոքմաջյանից:
Հիշեցնենք, որ սեպտեմբերի 10-ին քրեական գործ է հարուցվել «Ֆեյսբուքում»՝ Հովհաննես Թոքմաջյանի անձնական էջին տիրանալու դեպքի առթիվ:
Նշենք, որ համացանցում տարածվել է ՀՊՃՀ ռեկտոր Հովհաննես Թոքմաջյանի իբրեւ թե ֆեյսբուքյան նամակները: Դրանցից մեկի համաձայն` բուհի ռեկտորի եւ նրա աշխատակցուհիներից մեկի միջեւ սիրային կապ կա: Մեկ այլ նամակում անդրադարձ է կատարվում նաեւ ՀՀ ԿԳ նախարար Արմեն Աշոտյանին. վերջինիս ուղղված անբարո խոսքեր են հնչում:
