Արտյոմ Կարապետյանի՝ («Շեկո») սպանության համար 17 տարվա ազատազրկման դատապարտված՝ Գյումրիի նախկին քաղաքապետ Վարդան Ղուկասյանի եղբորորդու՝ Վահե Ղուկասյանի գործը սեպտեմբերի 19-ին կքննվի Վերաքննիչ քրեական դատարանում:

NEWS.am-ը Դատական տեղեկատվական համակարգից տեղեկացավ, որ Վահե Ղուկասյանի փաստաբան Հայկ Ալումյանը պահանջում է բեկանել եւ  փոփոխել Շիրակի մարզի ընդհանուր իրավասության առաջին ատյանի դատարանի` կայացրած վճիռը` ՀՀ քր. օր-ի 34-104 հոդ. 2-րդ մասի 6-րդ կետով եւ 104 հոդ. 1-ին մասով առաջադրված մեղադրանքներում Վահե Ղուկասյանին ճանաչել անմեղ,  մնացած մասով` նշանակված պատիժը մեղմացնել:

Մեր տեղեկություններով՝ գործը քննվելու է վճռաբեկության կարգով: Նշենք, որ դատավորը Եվա Դարբինյանն է:

Հիշեցնենք, որ դեպքը տեղի էր ունեցել 2013թ. ապրիլի 23-ին։ Գյումրիի Շիրակացի 54բ շենքի մոտից հրազենային վնասվածքներով հիվանդանոց էին տեղափոխվել «Քավոր Հարութը» եւ «Շեկոն», վերջինս հիվանդանոցում մահացել էր: Ապրիլի 24-ին ոստիկանության Գյումրիի բաժնում Գյումրիի նախկին քաղաքապետ Վարդան Ղուկասյանի եղբորորդին՝ 24-ամյա Վահե Ղուկասյանը, խոստովանել էր, որ նշված հանցագործությունը կատարել է ինքը:

Նշենք, որ «Քավոր Հարութը» եւ «Շեկոն» նախկինում խնդիրներ են ունեցել Գյումրիի նախկին քաղաքապետ Վարդան Ղուկասյանի հարազատների հետ: Վահե Ղուկասյանի եւ «Քավոր Հարութի» միջեւ հակամարտության պատմությունը գալիս է դեռեւս 2013-ից, երբ «Քավոր Հարութի» այն ժամանակ դեռ անչափահաս որդին՝ Գեւորգ Խաչատրյանը, Սլաբոտկա թաղամասում վիճաբանելով Վարդան Ղուկասյանի եղբոր ՝Գեւորգ Ղուկասյանի հետ, հարվածել էր վերիջինին՝ հասցնելով մարմնական վնասվածք: Այս դեպքից հետո հակամարտող ընտանիքների երիտասարդները հաշտության եզրեր չգտան, մինչեւ տեղի ունեցավ ողբերգություն։