Ասորիների համընդհանուր դաշինքը եւ Հայ Դատի Ամերիկայի հանձնախումբը համատեղ նամակ են հղել ԱՄՆ կոնգրեսական, Ներկայացուցիչների պալատի արտաքին հարաբերությունների հանձնաժողովի նախագահ Էդվարդ Ռոյսին՝ կապված Իրաքում ասորիների հետապնդումների հետ:
Ինչպես հաղորդում է ասորական AINA գործակալությունը, նամակի հեղինակները մտահոգություն են հայտնում Իրաքում «Իսլամական պետություն» խմբավորման կողմից ասորիների եւ այլ փոքրամասնությունների նկատմամբ հալածանքների առնչությամբ: Նրանք ուշադրություն են հրավիրում Հյուսիսային Իրաքում Նինվեի հարթավայրի քաղաքներից ու գյուղերից 200 հազար ասորիների փախչելու փաստի վրա, քանի որ այդ բնակավայրերը գրավել են «Իսլամական պետության» զինյալները:
Նամակի հեղինակները կոչ են անում այդ տարածքներում ՄԱԿ-ի հովանու ներքո անվտանգության գոտի ստեղծել, տեղի ասորիներից ինքնապաշտպանության ուժեր ձեւավորել եւ անհապաղ մարդասիրական օգնություն տրամադրել տուժածներին: