«Վանաձոր» քրեակատարողական հիմնարկում գտնվող կալանավոր Տիգրան Մելիքյանը դադարեցրել է հացադուլը: Այս մասին NEWS.am-ին ասաց դատարանում նրա գործով դատախազ, Շիրակի մարզի դատախազի տեղակալ Արմեն Շիրոյանը:
Արմեն Շիրոյանը սեպտեմբերի 17-ին հանդիպել է ամբաստանյալի հետ ու տեղեկացել, թե ինչու է վերջինը որպես հացադուլը դադարեցնելու պայման նշել իր հետ հանդիպումը։
«Ես հանդիպեցի նրան, լուրջ բան չկա, նրա պահանջն ու հացադուլը վերաբերում էր դատավարական գործընթացին, այլ մանրամասներ չեմ կարող հաղորդել, քանի որ լուրջ ոչինչ չկա»,- ասաց Արմեն Շիրոյանը:
Հիշեցնենք, որ Տիգրան Մելիքյանը հացադուլի մեջ էր սեպտեմբերի 5-ից եւ պահանջում էր հանդիպում իր գործով դատախազ, ՀՀ Շիրակի մարզի դատախազի տեղակալ Արմեն Շիրոյանի հետ:
Նշենք, որ Տիգրան Մելիքյանին առաջադրվել է մեղադրանք Ք.Օ 104 հոդվածի հատկանիշներով. նա մեղադրվում է 2013թ. մայիսի 15-ին գրող Հրանտ Մաթևոսյանի եղբորորդու` Մոտկորի անտառապետ Թովմա Մաթևոսյանի սպանության մեջ: Այդ ժամանակ Տիգրան Մելիքյանը ՀՀ բնապահպանության նախարարության աշխատակազմի բնապահպանական պետական տեսչության Լոռու տարածքային բաժնի տեսուչն էր։ Նա արդեն 18 ամիս կալանավորված է։