Ուկրաինայի նախագահ Պյոտր Պորոշենկոն համարում է, որ ներկայումս աշխարհի վերաբաժանման նոր փորձ է արվում, եւ Ուկրաինան այդ փորձի կենտրոնում է հայտնվել: Այս մասին նա հայտարարել է ԱՄՆ Կոնգրեսի պալատի նիստում, հաղորդում է ՈՒՆԻԱՆ-ը:
«Ուկրաինայի դեմ ուղղված ագրեսիան դարձել է աշխարհում ագրեսիաների վատագույն հետեւանքներից մեկը: Աշխարհը կանգնած է անվտանգության սարսափելի ճգնաժամի առջեւ: Հիմա մենք ականատես ենք լինում աշխարհի նոր վերաբաժանման փորձի, եւ Ուկրաինան դրա կենտրոնում է հայտնվել: Այսօրվա պատերազմի արդյունքը կորոշի՝ ստիպված կլինե՞նք մենք ընդունել սարսափելի ու մութ Եվրոպան որպես նոր աշխարհի մաս»,-ասել է նա:
Պորոշենկոյի խոսքով՝ պատերազմը, որտեղ այսօր պայքարում են երիտասարդ ուկրաինացի տղաները, ազատ աշխարհի համար է: Բացի այդ, նա հիշեցրել Մալայզիական ավիաուղիներին պատկանող «Բոինգ»-ի աղետի մասին, որին հարվածել էին Դոնբասի երկնքում: «Դա ահաբեկչության ակտ էր: Ցավոք, այդ ողբերգությունը ստիպեց շատերին արթնանալ եւ մտածել Ուկրաինայում տիրող վիճակի մասին: Ցինիկորեն խփված «Բոինգ»-ը եւս մեկ հարց բարձրացրեց, մենք այսօր ահաբեկչության դեմ պայքարի առաջատար դիրքերում ենք եւ մենք պետք է միավորենք բոլոր ուժերը ահաբեկչության դեմ պայքարելու համար, որպեսզի արդյունավետորեն արձագանքենք այդ մարտահրավերին»,-ընդգծել է Պորոշենկոն: