G20-ի մասնակիցներն աջակցել են այն հայտարարությունը, որ Ռուսաստանը պետք է մասնակցի նոյեմբերի գագաթաժողովին, հայտնում է ԻՏԱՌ-ՏԱՍՍ-ը` վկայակոչելով Ավստրալիայի գլխավոր գանձապետ Ջո Հոքիին:
««Քսանի» աշխատանքին որեւէ մեկի մասնակցելու որոշումը կայացնում է ոչ թե Ավստրալիան, այլ G20-ի բոլոր անդամները: Ըստ երկրների` չի կարելի փակել դռները, եւ Ռուսաստանը պետք է մասնակցի գագաթաժողովին: Երկխոսությունը պետք է շարունակվի. այդպիսին է «քսանի» մասնակից բոլոր երկրների դիրքորոշումը։ G20-ը տնտեսական, այլ ոչ թե քաղաքական հարթակ է», — նշել է Հոքին:
Ավելի վաղ ՌԴ արտգործնախարար Սերգեյ Լավրովը հայտարարել էր, թե իրեն չի զարմացրել ավստրալացի գործընկեր Ջուլի Բիշոփի հայտարարությունն այն մասին, որ արեւմտյան երկրներին ցանկանում են համոզել, որպեսզի Ռուսաստանին չհրավիրեն G20-ի գագաթաժողովին։
