ՀՀ ԱՆ «Արթիկ» քրեակատարողական հիմնարկի կալանավոր Վահե Ղուկասյանը Վերաքննիչ դատարանի որոշմամբ սեպտեմբերի 12-ին տեղափոխվել է «Նուբարաշեն» քրեակատարողական հիմնարկ՝ նրա ներկայությունը դատական նիստերին ապահովելու նպատակով: Այս մասին NEWS.am-ի թղթակցին հայտնեցին ՀՀ ԱՆ ՔԿՎ հանրային կապերի բաժնից:
Նրանց փոխանցմամբ՝ Վահե Ղուկասյանի՝ ՔԿՀ-ում «բեսպրեդել հաստատելու», կարգուկանոնին չենթարկվելու, քննիչի հետ հակամարտության մեջ մտնելու, տեսազանգի միջոցով իր ընկերուհու հետ զրուցելու եւ այդ պատճառով ՀՀ ԱՆ «Նուբարաշեն» քրեակատարողական հիմնարկ տեղափոխվելու մասին լուրերն իրականությանը չեն համապատասխանում:
Նշենք, որ «Ժողովուրդը» գրել էր, թե Գյումրիի նախկին քաղաքապետի եղբորորդուն՝ Վահե Ղուկասյանին, «Արթիկ» քրեակատարողական հիմնարկից տեղափոխել են «Նուբարաշեն» ՔԿՀ: Այնտեղ, ուր նա կրում էր իր պատիժը կալանավորվելու առաջին օրերից: «Ժողովուրդ» օրաթերթի տեղեկություններով՝ Ղուկասյանը «Արթիկ» ՔԿՀ-ում փորձել է «բեսպրեդել» հաստատել, քանի որ այնտեղ նրա համար առավել հարմարավետ պայմաններ են եղել՝ պատիժը կրելու համար: Նա բանտում հակամարտության մեջ է մտել անգամ քննիչի հետ, եւ, հակառակ ՔԿՀ ղեկավարության հրահանգներին, չի ենթարկվել կարգուկանոնին ու տեսազանգի միջոցով զրուցել է իր ընկերուհու հետ: Ամենայն հավանականությամբ ՔԿՀ ղեկավարությունը «գլուխն ազատելու» համար խնդրել է երեւանյան վերադասին՝ Վահե Ղուկասյանին «Նուբարաշեն» ՔՀԿ տեղափոխել»,-գրում է թերթը: