«Վերնիսաժում» մայիսի 17-ին հնչած կրակոցներից վիրավորված, ապա կալանավորված Վալերի Հովհաննիսյանի վիճակը կայուն է, նա գտնվում է բժիշկների հսկողության տակ: Այս մասին NEWS.am-ին ասաց ԱՆ ՔԿՀ տեղեկատվության եւ հասարակայնության հետ կապերի վարչության պետ Գոռ Ղլեչյանը:
Նրա խոսքով՝ Վալերի Հովհաննիսյանը ենթարկվել է գործիքային եւ ոչ գործիքային մի քանի հետազոտությունների, եւ եթե վիրահատական միջամտության կարիք լինի, ապա անպայման կարվի:
«Վիճակը կայուն է, համապատասխանում է հետվիրահատակական վիճակին»,- ասաց Գոռ Ղլեչյանը:
Նշենք, որ կալանավորի հայրը պնդում է, որ որդու վիճակը շատ վատ է, նրան համապատասխան բուժում չեն նշանակում:
Ինչպես ավելի վաղ հայտնել էր NEWS.am-ը, ըստ նախնական վարկածի՝ Ներսես Մելքոնյանն ու նրա ընկեր Վալերի Հովհաննիսյանը, մայիսի 17-ին՝ ժամը 13:30-ի սահմանում, «Վերնիսաժի» մոտ վեճի են բռնվել Գոռ Առաքելյանի հետ եւ բռնություն կիրառել նրա նկատմամբ, հնչել էին կրակոցներ, 5 մարդ վիրավորվել էր, այդ թվում՝ Ներսես Մելքոնյանն ու նրա ընկեր Վալերի Հովհաննիսյանը, նաեւ պատահական անցորդներ: ԱԺ ԲՀԿ-ական պատգամավոր Կարո Կարապետյանի փեսան՝ Գոռ Առաքելյանը, մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու համար եւ երկամսյա նախնական կալանք է սահմանվել։ Հունիսի 9-ին կալանավորվել էր նաեւ Ներսես Մելքոնյանը, նրան մեղադրանք է առաջադրվել խուլիգանություն կատարելու համար: Նույն մեղադրանքով հուլիսին կալանավորվել է նաեւ Վալերի Հովհաննիսյանը:
