Բնականաբար, Եվրասիական միությանը Հայաստանի անդամակցությունից եւ Ուկրաինայի եւ ԵՄ-ի միջեւ ասոցացման համաձայնագրի վավերացումից հետո կլինեն աննշան պահեր, որոնք համաձայնեցման կարիք կունենան: Այս մասին NEWS.am-ի թղթակցի հետ զրույցում հայտնել է ՀՀ-ում Ուկրաինայի արտակարգ եւ լիազոր դեսպան Իվան Կուխտան՝ հավելելով, որ սա լուծելի հարց է:
Ուկրաինան, ըստ նրա, հարգում է Հայաստանի ընտրությունը: «Յուրաքանչյուր պետության իրավունքն է քաղաքական կամ տնտեսական միություններին անդամակցելը կամ ինչ-ինչ համաձայնագրերի ստորագրումը: Ինչ վերաբերում է Ուկրաինայի եւ Հայաստանի փոխհարաբերություններին այն բանից հետո, երբ Հայաստանն անդամակցի ԵՏՄ-ին, Կիեւն ու Երեւանը հետագայում էլ կզարգացնեն հարաբերությունները գործնական բոլոր մակարդակներում», - նշել է Կուխտան՝ ընդգծելով, որ եւ Հայաստանը, եւ Ուկրաինան հատուկ նշանակություն են տալիս տնտեսական համագործակցությանը:
Դեսպանը հայտնել է, որ մեկ ամիս առաջ հանդիպել էր ՀՀ էկոնոմիկայի նախարարի հետ: «Եվ մենք եւս մեկ անգամ ընդգծեցինք ու ուշադրություն հրավիրեցինք այն բանին, որ մեր տնտեսական հարաբերությունները բավական լավ մակարդակում են, եւ այս պարագայում Հայաստանի ԵՏՄ մտնելուց հետո, բնականաբար, մենք շահագրգռված ենք հարաբերությունների հետագա զարգացման հարցում:
Եվ Հայաստանը, եւ Ուկրաինան ԱՊՀ շրջանակում ազատ առեւտրի գոտու անդամ են, մենք ունենք երկկողմ նորմատիվ փաստաթղթեր, որոնք եւս կանոնակարգում են երկու երկրների միջեւ ազատ առեւտրի գոտին», - ասել է Իվան Կուխտան:
Եվ, ըստ նրա, շատ լավ է, որ տարեվերջին նախատեսվում է հայ-ուկրաինական միջկառավարական հանձնաժողովի անցկացում Երեւանում, որի ընթացքում կքննարկվեն տնտեսական հետագա համագործակցության զարգացման հարցեր:
Հիշեցնենք, Եվրասիական միությանը Հայաստանի միացումը նախատեսվում է հոկտեմբերին՝ Մինսկում ԵՏՄ անդամների գագաթաժողովի շրջանակում:
