Ռուսաստանի նախագահ Վլադիմիր Պուտինին «Սյունյաց արծիվներ» մեդալով պարգեւատրելու մասին լուրը ապատեղեկատվություն է: Այս մասին NEWS.am-ի թղթակցի հետ զրույցում ասաց Սպորտի եւ երիտասարդության հարցերի փոխնախարար, «Սյունյաց արծիվներ» կազմակերպության նախագահ Խաչիկ Ասրյանը:
Նա նշեց, որ այժմ գտնվում է Վայոց Ձորում՝ խրամատներում, մասնակցում է անկախության տարեդարձի միջոցառումների շարքին զինվորականներին պարգեւատրելու, խրախուսելու տեսքով:
«Այն ինչ չի կատարվել, ես չեմ մեկնաբանում: Այդ տեղեկատվությունը
ինձ համար անակնկալ էր, գուցե հաճելի անակնկալ: Խաչիկ Ասրյանը իր ապրած կյանքով, ողջ գործունեությամբ նպաստում է հայոց պետականության անընդհատ հզորացման գործընթացներին»,-ասաց նա:
Նշենք, որ «Չորրորդ իշխանություն» թերթը գրել է, թե մինչ Սյունիքը սպասման մեջ է, թե ով է ստանձնելու մարզի ղեկավարի պարտականությունները, այդ տարածաշրջանում առաջացած «Սյունյաց արծիվներ» հասարակական կազմակերպության նախագահ, փոխնախարար Խաչիկ Ասրյանը «հետաքրքիր» մտահղացումներով է հանդես գալիս: «ՉԻ» տեղեկություններով՝ տարբեր տեղերում նա հայտարարել է, թե ցանկանում է առաջիկայում ՌԴ նախագահ Վլադիմիր Պուտինին «Սյունաց արծիվներ» մեդալով պարգեւատրել: «Վերջինս մասնավոր զրույցներում ասել է, թե այդ ամենը կազմակերպելու համար հիմա բանակցություններ է վարում ՀՀ իշխանությունների հետ, որպեսզի սպասվելիք պարգեւատրման միջոցառումը ներկայացուցչական լինի: Փոխնախարարի նպատակը մեդալ տալու արարողությունը Սյունիքում կազմակերպելն է»,-գրել է թերթը։