Հայաստանը որակապես նոր քաղաքացիական հասարակության ձեւավորման շրջան է ապրում: Սեպտեմբերի 19-ի մամուլի ասուլիսում նման կարծիք է հայտնել «Ընդդեմ իրավական կամայականության» ՀԿ-ի նախագահ, Հայաստանի առաջին օմբուդսմեն Լարիսա Ալավերդյանը:
Ըստ նրա՝ Հայաստանում քաղաքացիական հասարակության սաղմերն առաջացան 1988-ի ղարաբաղյան շարժման տարիներին: Ու թեեւ այդ օրվանից քաղաքացիական հասարակության զարգացումը չի դադարել, այնուամենայնիվ այն դեռ չի հասել այն մակարդակին, երբ քաղաքացիները, ակտիվ դիրքորոշում ցուցաբերելով, ազդում են իշխանությունների որոշումների վրա: Սակայն որոշ ազդանշաններ, ըստ Ալավերդյանի, վկայում են, որ հայ հասարակությունն այդ ուղու վրա է: Որպես օրինակ նա նշել է «ԴԵՄ ԵՄ» նախաձեռնությունը, որն իր պրոֆեսիոնալիզմով եւ հետեւողականությամբ հասավ ՍԴ-ի թեեւ հակասական, բայց որոշակի որոշման կայացմանը:
Հարցին, թե արդյոք քաղաքացիական հասարակության զարգացման համար նշանակություն ուներ Սերժ Սարգսյանի անձը, Ալավերդյանը պատասխանել է, որ ի տարբերություն երկրորդ նախագահ Ռոբերտ Քոչարյանի, որը հարցերի լուծման ուժային տարբերակի կողմնակից էր, պետության գործող նախագահը զերծ է մնում ուժի կիրառումից, ինչը դրական է անդրադառնում քաղաքացիական հասարակության զարգացման դինամիկայի վրա:
Մամուլի ասուլիսի մյուս բանախոս, «Ինտերնետ հանրություն» հասարակական կազմակերպության փոխնախագահ Գրիգոր Սաղիյանը նշել է, որ լիարժեք քաղաքացիական հասարակության կայացման համար ոչ պակաս կարոեւոր դեր ունի ազադ համացանցը: Ըստ նրա՝ Հայաստանը 2013թ., համաձայն «Freedom on the Net 2013»-ի զեկույցի, հայտնվել է լիակատար ազատ համացանցով երկրների գոտում: «Հաշվի առնելով, որ հանրապետությունը մտնում է ԵՏՄ, որտեղ ազատության մակարդակը զգալի զիջում է մերին, անհրաժեշտ է ցանկացած կերպով պահպանել արդեն իսկ ունեցած ձեռքբերումները», - հավելել է Սաղիյանը:
