Արտառոց դեպք է գրանցվել այսօր՝ սեպտեմբերի 19-ին, ՀՀ վերաքննիչ դատարանում։ Թմրանյութ իրացնելու մեղադրանքով դատապարտված Արմեն Թամրազյանի գործով վերաքննիչ բողոքի քննությանը վիճել են դատապարտյալի մայրը՝ Ալվարդ Թամրազյանը եւ գործով դատախազ Գ. Խանզադյանը:
Ալվարդ Թամրազյանը լրագրողներին պատմեց, որ վիճաբանությունն սկսվել է, երբ դատարանը հեռացել է խորհրդակցական սենյակ. նրա որդին դատարանում հայտարարել է, որ գործով քննիչ Արման Հարությունյանը նախաքննության ընթացքում իր ձեռքի խալը տեսնելով՝ նկատել է, որ այդ խալի առկայությունը նշանակում է, որ ինքը «գոմիկ է»։
«Դրանից դատախազը բորբոքվեց եւ տղայիս մայր հայհոյեց, ես էլ այդտեղ նստած»,- վրդովված պատմեց տիկին Ալվարդը:
Դատական նիստն ընդհատվել է առաջացած վեճի պատճառով, դատախազը լքել է նիստերի դահլիճը:
Տիկին Ալվարդը նույնիսկ դատարանի միջանցքում չէր հանգստանում, դատախազի հետեւից շարունակում էր բղավել «փչացած»։
Նա լրագրողներին ցույց տվեց, իր ձեռքի խալը, որ, նրա խոսքով, որդուն անցել է ժառանգաբար եւ չէր կարող «գոմիկ լինելու նշան լինել»։
Արմեն Թամրազյանի փաստաբանը պատրաստվում է հաղորդում տալ ոստիկանություն: