Քալիֆորնիայի նահանգապետ Ջերի Բրաունը դպրոցներում ուսումնասիրվող նյութերի ցուցակում Հայոց ցեղասպանության թեմայի ընդրկման վերաբերյալ օրինագիծ է ստորագրել, գրում է «Asbarez»-ը:
Արդեն օրենք դարձած նախագծի համաձայն, Հայոց ցեղասպանության ականատեսների բանավոր վկայությունները կընդգրկվեն պետական դպրոցների Մարդու իրավունք առարկայի ուսումնական ծրագրում:
Նշենք, որ նոր օրենքը հիմնվում է 1985թ. ընդունված առաջին օրենսդրական ակտի վրա, ըստ որի՝ Հայոց ցեղասպանության թեման ընդգրկվել էր սոցիալական հետազոտությունների առարկայի ուսումնական ծրագրում:
Հիշեցնենք, որ Քալիֆորնիայի սենատը օգոստոսի 26-ին միաձայն քվեարկել է Հայոց ցեղասպանության թեման նահանգի անվճար դպրոցներում ուսուցանվող նյութերի ցանկում ընդգրկելու մասին օրինագծի օգտին: Օրինագիծը, որը ներկայացրել է Քալիֆորնիայի օրենսդիր մարմնի անդամ Ադրին Նազարյանը, ենթադրում է Հայոց ցեղասպանության թեմայի ներառումը դպրոցների 7-12-րդ դասարանների դասընթացներում:
