«Նաիրտում» անիմաստ աշխատավարձ վճարելն այլեւս անհնար է, հայտարարել է էներգետիկայի նախարար Երվանդ Զախարյանը: Նա հիշեցրել է, որ աշխատակիցների աշխատավարձը վճարվում է պետական էներգաընկերությունների՝ Երեւանի ՋԷԿ-ի եւ Որոտանի ՀԷԿ-ի եկամուտներից:
«Կառավարությունն ու հանրապետության ղեկավարությունը գիտակցում են դա: Սակայն գործարանի աշխատակիցների դժգոհությունները եւ նրանց պահանջները լիովին արդար են: Եվ նախագահը, եւ վարչապետը լրջորեն մտահոգված են ստեղծած իրավիճակով», - հայտարարել է նախարարը:
Նրա խոքով՝ գործարանի հարցով ստեղծված աշխատանքային խումբը կարճ ժամկետում պետք է գործարանի ապագայի վերաբերյալ առաջարկությունների փաթեթ նախապատրաստի:
Նախարարը նշել է, որ ներկայումս «Նաիրիտում» 2261 աշխատող է հաշվվում: Ընդ որում, մոտ 1/5-րդը ղեկավար օղակն է (425): Նույնիսկ մասնագետներն են ավելի քիչ՝ 361 մարդ:
Հիշեցնենք, որ «Նաիրիտ գործարան» ՓԲԸ-ն՝ Հայաստանի խոշորագույն քիմիական գործարանն ու քլորոպրենային կաուչուկի արտադրողը, 2010թ. ապրիլից դադարեցրել էր գործունեությունը: 2013թ. հայտարարվել էր ռուսական «Ռոսնեֆթ» կոնցեռնի կողմից գործարանում ներդրումներ իրականացնելու ծրագրերի մասին: