Ռուսաստաբնակ հայ գործարար Լեւոն Հայրապետյանն անպայման ազատ կարձակվի։ Լրագրողների հետ զրույցում այսօր՝ սեպտեմբերի 19-ին, նման համոզմունք հայտնեց Ռուսաստանի հայերի միության նախագահ Արա Աբրահամյանը։
«Պետք ա մի քիչ համբերություն ունենանք, ինձ թվում ա՝ ամեն ինչ կպարզվի, եւ Լեւոն Հայրապետյանը դուրս կգա։ Մենք բոլորս մտահոգված ենք։ Երկուսուկես միլիոն հայություն Ռուսաստանում մտահոգված ա այդ խնդրով»,- ասաց Արա Աբրահամյանը։
Արա Աբրահամյանը նշեց, որ վերադառնալուց հետո ինքը կրկին կզբաղվի Լեւոն Հայրապետյանի խնդրով, որպեսզի գոնե հաշվի առնելով նրա առողջական վիճակը, փոխվի նրա խափանման միջոց կալանքը։
Ռուսաստանի հայերի միության նախագահը նաեւ հույս հայտնեց, որ «ԱՖԿ Սիստեմա» հոլդինգի տնօրենների խորհրդի նախագահ Վլադիմիր Եվտուշենկովը, որը նույնպես որպես մեղադրյալ անցնում է «Բաշնեֆտ»-ի գործով, լույս կսփռի գործի վրա, կպատասխանի բոլոր հարցերին, որից հետո Լեւոն Հայրապետյանն ազատ կարձակվի։
«Եվտուշենկովն ամենակարեւոր, ամենաազդեցիկ օլիգարխներից մեկն ա եւ հայ ժողովրդի բարեկամը, այստեղ բավականին ներդրումներ ա արել»,- ասաց Աբրահամյանը՝ վստահություն հայտնելով, որ նրա ցուցմունքները կարագացնեն գործընթացը, իսկ Լեւոն Հայրապետյանը կարդարացվի։
Արա Աբրահամյանի խոսքով՝ սա ոչ թե զուտ Լեւոն Հայրապետյանի անձի, այլ շատ ավելի բարդ խնդիր է։
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: լեւոն Հայրապետյանը մինչեւ դեկտեմբերի 15-ը կմնա կալանքի տակ։
