ՀՅԴ Բյուրոյի ներկայացուցիչ Հրանտ Մարգարյանի կարծիքով՝ սահմանադրական փոփոխությունները կանխելու են իշխանության վերարտադրությունը: Այս մասին այսօր՝ սեպտեմբերի 19-ին, «Հայաստան-Սփյուռք» հինգերորդ համաժողովի ժամանակ լրագրողների հետ զրույցում ասաց Հրանտ Մարգարյանը:
«Ամենածիծաղելի բանն այն է, որ այս իշխանությունները վերարտադրվել են գործող սահմանադրությամբ, ինչպե՞ս կարելի է ասել՝ սահմանադրությունը փոխում են, որ վերարտադրվեն: Հակառակը՝ սահմանադրության փոփոխությունը կանխելու է իշխանության վերարտադրությունը, կանխելու է, որ որեւէ մեկը կարողանա այս երկրի մեջ անձնական իշխանություն ստեղծել: Կարծում եմ, որ համակարգային փոփոխությունն իրական ժողովրդավարություն է բերելու մեր երկրի համար, ազգային ժողովի մակարդակով հարցերը քննարկվելու, լուծում են ստանալու, եւ դա է երկրի առաջընթացի հիմնական գրավականը: Մենք պատմական առիթ ունենք երկիրը ճիշտ ուղու վրա դնելու: Նրանք ովքեր դեմ են, դեմ են Հայաստանի զարգացմանը, անձնական ամբիցիաների պատճառներով երկրի առաջընթացին դեմ են»,-ասաց Հրանտ Մարգարյանը՝ նշելով, որ կար ժամանակ, երբ ԲՀԿ-ն էլ էր համաձայն սահմանադրական բարեփոխումների անհրաժեշտության հետ, եւ որ իրենք խորհրդարանական մյուս ոչ իշխանական ուժերի հետ խոսել են, ասել են, որ լավ կլինի՝ միասնական հանրահավաքին իրենք ներկա չլինեն:
Հիշեցնենք, որ սեպտեմբերի 17-ի՝ քառյակի փակ նիստից հետո ԲՀԿ խմբակցության քարտուղար Նաիրա Զոհրաբյանը լրագրողներին ասել էր, որ ՀՅԴ-ն չի մասնակցի հոկտեմբերի 10-ին Ազատության հրապարակում կայանալիք միասնական հանրահավաքին, այն հիմնավորմամբ, որ կան էական տարակարծություններ սահմանադրական փոփոխությունների հարցում: