Դերասան Վարդան Պետրոսյանի մասնակցությամբ ողբերգական վթարից հետո տուժող կողմի վարորդը «Վազ 21214» մակնիշի մեքենան պտտել է 180 աստիճան, ինչն ապացուցում է, որ վթարը տեղի է ունեցել փողոցի բանուկ մասում եւ ոչ կողնակում: Այս մասին այսօր՝ սեպտեմբերի 19-ին, Կոտայքի մարզի ընդհանուր իրավասության դատարանում դատական նիստից հետո NEWS.am-ի հետ զրույցում ասաց Վարդան Պետրոսյանի փաստաբան Նիկոլայ Բաղդասարյանը:
«Դատաավտոտեխնիկական փորձագետ Խորեն Զաքարյանը ներկայացրեց մեզ մի փաստ, որն ամենաէականն էր հարցաքննության ժամանակ: «Նիվա» մանկիշի մեքենան 180 աստիճան պտտվել է եւ հայտնվել ուղղահայց դիրքում բանուկ մասի վրա դեպի Եղվարդի կողմը, ուղղակի պետք է Նիվան 180 աստիճան հետ տանել, ու այն կհայտնվի բանուկ մասի վրա: Եթե վթարը լիներ կողնակի վրա, Նիվան չէր կարող 180 աստիճան պտտվել»,- նշեց Նիկոլայ Բաղդասարյանը, որը դատաքննության առաջին օրվանից փորձում է ապացուցել, որ վթարը տեղի է ունեցել փողոցի բանուկ մասում, եւ որ Վարդան Պետրոսյանն անմեղ է:
Նշենք, որ դատարանում, Վարդան Պետրոսյանի փաստաբանի հարցին, թե եթե «Վազ 21214» մակնիշի մեքենան 180 աստիճան հետ շրջեն, այն որտեղ կհայտնվի, փորձագետ Խորեն Զաքարյանը խուսափում էր պատասխանել:
Փաստաբանի համար կասկածելի է նաեւ այն, որ սատաավտոտեխնիկական փորձագիտական եզրակացությունը կազմվել է շատ արագ:
«Փորձաքննությունն սկսվել է նոյեմբերի 4-ին, 5-ին փորձագետի կողմից միջնորդություն է ներկայացվել լրացուցիչ ելակետային տվյալներ տրամադրել: Նոյեմբերի 6-ին, ժամը 16:30-ին քննչական գործողությունն ավարտվել է եւ տրամադրել են տվյալները, դուք 26 էջոց եզրակացությունը գրել, վերջացրել եք ամսի 7-ին: Ինչպե՞ս է դա հնարավոր, եթե չեք ունեցել անգամ մեկ օր ժամանակ»:
Փորձագետն ի պատասխան ասաց, որ եզրակացության վրա աշխատել է երկու փորձագետ: Այս պատասխանը Նիկոլայ Բաղդասարյանին չբավարարեց:
Երբ Նիկոլայ Բաղդասարյանը հարցեր ուղղեց փորձագետին վթարի պահին Հակոբյանների մեքենայի հետընթաց կատարելու հավանակության վերաբերյալ, դա բարկացրեց տուժողների իրավահաջորդներին` Արթուր Հակոբյանին եւ Նաիրա Հայրապետյանին:
«Ինքը ոնց ուզում ա, լրագրողների համար պատմում ա, որ եթեր մտնի: Էս տարիքի մարդու էս չափի սուտ չեմ տեսել էլի, երկու մարդ նստել են ստերի վրա »,- դատավորին դիմեց Արթուր Հակոբյանը: Նրան միացավ Ռուբեն Բալոյանը ասելով` «ասուլիս են տալիս»:
Փորձագետը հստակ պատասխան չտվեց Վարդան Պետրոսյանի փաստաբանի այն հարցին, թե արդյոք հնարավոր է ճանապարհին թափված ապակիներով որոշել դեպքի վայրը:
«Տեսականորեն շատ բան է հնարավոր` եւ հնարավոր է, եւ հնարավոր չէ: Դա կախված է կոնկրետ օբյեկտից, թե որի ապակին է հանդիսանում»,- պատասխանեց փորձագետը:
Փորձագետի հարցաքննություն ավարտվեց, հաջորդ դատական նիստը տեղի կունենա հոկտեմբերի 3-ին:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։
