Աշխարհի խոշորագույն YouTube վիդեոհոսթինգը, որը պատկանում է Google ընկերությանը, ծրագրում է միլիոնավոր դոլարներ ծախսել հանրահայտ վիդեոբլոգերների համար: Ներդրման նպատակն է՝ խրախուսել կայքի աստղերին, որպեսզի բարձրորակ նյութեր ստեղծեն եւ չփոխադրվեն այլ հարթակներ:

2011 թվականի վերջից YouTube-ն արդեն 100 մլն դոլար է տրամադրել շուրջ 100 ալիքներին աջակցելու համար: Ֆինանսավորում են ստացել, մասնավորապես, ESPN-ն ու Մադոննան, ինչպես նաեւ պակաս հայտնի այլ վիդեոբլոգերներ: Բացի այդ, կայքը մարքեթինգային աջակցություն է ցուցաբերում մեծ թվով բաժանորդներ ունեցող օգտատերերին: Օրինակ՝ YouTube-ը վճարում է խոհարարական դասընթացներ անցկացնող Ռոզաննա Պանզինոյի արտաքին եւ հեռուստատեսային գովազդի համար:

Ըստ Vesti.ru-ի, նոր ներդրումը հիմնականում ուղղված է լինելու աստղերի աջակցությանը: YouTube-ը կսկսի նրանց վճարել կոնկրետ շոուներ ստեղծելու եւ դրանք կայքի միլիարդավոր լսարանի շրջանում տարածելու համար:

Աշխատելու այժմյան սխեման չի գոհացնում ո՛չ Google-ին, ո՛չ YouTube-ի աստղերին, ովքեր հիմնականում ստիպված են լինում ինքնուրույն վաստակել: Բլոգերները դժգոհում են վիդեոգովազդի ցածր եկամուտներից: Իսկ մասնաբաժինը, որ նրանք վճարում են որոնողական համակարգին՝ հոլովակների ցուցադրության համար, նրանց կարծիքով, չափազանց բարձր է: Արդյունքում բազմաթիվ օգտատերեր ստիպված են իրենք վաստակել՝ առաջ մղելով տեսանյութի հովանավորչական ապրանքներն ու ծառայությունները, որպեսզի եկամուտները չկիսեն YouTube-ի հետ: