Լոռու մարզի Դարպաս գյուղում սեպտեմբերի 18-ին գայլերը հարձակվել են գյուղապետին պատկանող խոշոր եղջերավոր անասունների վրա, որոնք սարում արածելիս են եղել:

Գյուղապետ Սամվել Ավետյանը NEWS.am-ի հետ զրույցում ասաց, որ  իրեն պատկանող 5 գլուխ խոշոր եղջերավոր անասուններն անհետացել էին, երկար որոնումներից հետո միայն 2-ին են ողջ գտել, 3-ը հոշոտված են եղել:

«Գայլերը հաճախակի են հարձակվում, հիմնականում առավոտյան կամ կեսօրին։ Մեծ քանակությամբ՝ ոհմակներով գայլեր են հայտնաբերել։ Բնապահպանները որ ասում են՝  գայլերը սանիտարներ են բնության, թող մի հատ հաշվարկեն՝ գայլե՞րն են շատ, թե՞ մնացած կենդանիները։ Մի քանի հատ խոզ ու եղնիկ կա, հազարավոր գայլեր կան։ Էդքան անասուն ես կարա՞մ պահեմ, որ գայլերին պահեմ։ Գայլը օրական որ երեք հատ ուտի, ոչ մի անասուն էլ չի մնա»,-ասաց գյուղապետը։

Սամվել Ավետյանը նշեց, որ առայժմ չի կարող անասուններին սարերից իջեցնել, քանի որ մոտակայքում միակ արոտավայրը դա է, իսկ գյուղին մոտ դաշտերում խոտ չկա։

 «Սպասում եմ՝ մարդ լինի, վաճառեմ գնա։ Օգնություն ենք ուզում, որ գայլերին սակավացնեն։ 400 կգ միս ուներ էդ երեք անասունը, 800 հազար դրամ գումար է կազմում»,- ասաց նա՝ նշելով, որ գնորդ է փնտրում անասուններին վաճառելու համար, քանի որ այլեւս ի վիճակի չէ դրանք պահել։