Սեպտեմբերի 11-ի գիշերը Թբիլիսյան խճուղու արագաչափի մոտ Արմեն Հակոբյանին սպանած «Ցոցիկ» մականունով Արտակ Մինասյանը խոստովանել է իր մեղքը եւ քննչական փորձարարության ժամանակ ցույց տվել, թե ինչպես է դեպքը տեղի ունեցել։ Այս մասին հաղորդում է ոստիկանությունը։
«Ես էլ չպատկերացրեցի, թե ինչ կատարվեց հետս, խմած էի եւ խփել եմ Արմենի կրծքավանդակին»,- խոստովանում է Արտակ Մինասյանը։
Ավելի վաղ ոստիկանությունը հաղորդել էր, որ դեպքից ժամեր անց Քանաքեռ 2-րդ փողոցում ապրող Արտակ Մինասյանը, որը թաքնվել էր տան տանիքում, հայտնաբերվել էր եւ որպես կասկածյալ բերման ենթարկվել։
Նշենք, որ խուզարկության ժամանակ Արտակ Մինասյանի տնից հայտնաբերվել է դանակ, որն ուղարկվել է փորձաքննության։ Փաստի առթիվ Քանաքեռ-Զեյթունի քննչական բաժնում հարուցվել է քրեական գործ ՔՕ 104-րդ հոդվածի 1-ին մասի հատկանիշներով՝ սպանություն։