Թբիլիսիի Վերաքննիչ դատարանը կալանք է սահմանել Վրաստանի նախկին նախագահ Միխայիլ Սահակաշվիլիի, ինչպես նաեւ նրա ընտանիքի անդամների սեփականության նկատմամբ. կնոջ՝ Սանդրա Ռուլովսի, մոր՝ Գիուլա Ալասանիայի եւ տատիկի՝ Մզիա Ծերեթելիի: Ըստ ԻՏԱՌ ՏԱՍՍ-ի՝ այս մասին սեպտեմբերի 19-ին հայտարարել է Սահակաշվիլիի փաստաբան Օթար Կախիձեն:
Նրա խոսքով՝ կալանք է սահմանվել Քվարելիի շրջանում գտնվող Միխայիլ Սահակաշվիլիին պատկանող տան եւ հողատարածքի, Ռուլովսին պատկանող Թբիլիսիի բնակարանի, Ծերեթելիին պատկանող Նաթանեբի գյուղի անշարժ գույքի եւ ավտոմեքենայի, Ալասանիայի հողատարածքի եւ ավտոմեքենայի նկատմամբ: Կախիձեի տվյալներով, այս որոշմամբ Վերաքննիչ դատարանը բավարարել է Վրաստանի Գլխավոր դատախազության հայցը:
Փաստաբանի տեղեկացմամբ, քանի որ Վրաստանի ներսում գործող կանոնների համաձայն՝ Վերաքննիչ դատարանի որոշումը բողոքարկման ենթակա չէ, ինքն ու իր պաշտպանյալը մտադիր են դիմել Սահմանադրական դատարան, ինչպես նաեւ պատրաստվում են դիտարկել Մարդու իրավունքների եվրոպական դատարան դիմելու հնարավորությունը:
Նշենք, որ Սահակաշվիլին մեղադրվում է 2009-2012 թվականներին շուրջ 5 մլն դոլարի չափով պետական միջոցներ վատնելու մեջ:
Միխայիլ Սահակաշվիլին Վրաստանի նախագահի պաշտոնը զբաղեցրել է 2004 թվականի հունվարից մինչեւ 2013 թվականի նոյեմբերը: Այս տարվա օգոստոսի 1-ից նա բնակվում է ԱՄՆ-ում:
