Շնորհիվ հայ երիտասարդ զինծառայողների քաջության, ինչպես նաեւ փորձառու կամավոր զինվորների, հայկական կողմը կարողացել է հետ մղել հակառակորդին, կարողացել է արժանի հարված հասցնել եւ զսպման մեխանիզմներ ստեղծել: Այդ մասին սեպտեմբերի 20-ին «Հայաստան-սփյուռք» 5-րդ ֆորումին մասնակից հայկական սփյուռքի ներկայացուցիչների հետ հանդիպման ընթացքում հայտարարել է Հայաստանի պաշտպանության նախարար Սեյրան Օհանյանը՝ անդրադառնալով ղարաբաղյան հակամարտության գոտու շփման գծում լարվածության սրմանը:
Նրա խոսքով՝ վերջին տարիներին ադրբեջանական կողմը փորձում է լարվածություն ստեղծել եւ հայկական կողմերի հետ խոսել ուժի լեզվով: «Մեզ համար շատ կարեւոր է երկխոսությունը, ոչ թե հարկադրանքը, բայց այսօր մենք նույնպես արդեն հակառակորդի հետ խոսում ենք հարկադրանքի լեզվով, որպեսզի նա հասկանա, թե դա ինչ է նշանակում»,-ընդգծել է Սեյրան Օհանյանը:
Նրա խոսքով՝ ամռանը տեղի ունեցած իրադարձություններըմ եւս մեկ անգամ ապացուցեցին, որ բանակն անհրաժեշտություն է: «Ու դեռ շատ երկար տարիներ հայկական բանակը ժողովրդի անվտանգության երաշխավորն է լինելու: Մենք կարողանում ենք պաշտպանել մեր հայրենիքի սահմանները առանց որեւէ երրորդ ուժի: Աշխարհում չկա այլ հակամարտության գոտի, որտեղ առանց խաղաղապահների պահպանվում է հարաբերական անդորրը: Դա վկայում է այն մասին, որ հայկական բանակը պատրաստ է կատարել իր առջեւ դրված խնդիրները, չնայած ադրբեջանական կողմի ռազմաշունչ հռետորությանը»,-ամփոփել է պաշտպանության նախարարը: