Չեխական բանակի գլխավոր շտաբի պետ գեներալ Պետր Պավելը նշանակվել է ՆԱՏՕ-ի ռազմական կոմիտեի նախագահի պաշտոնում: Նոր նախագահի ընտրություններն անցկացվել են սեպտեմբերի 20-ին Վիլնյուսում՝ ՆԱՏՕ-ի Ռազմական կոմիտեի նիստի ավարտին:
Ինչպես «ՌԻԱ Նովոստիին» հաղորդել է Չեխիայի պաշտպանության նախարարության ներկայացուցիչ յան Պեյշեկը, գեներալին պաշտպանող հավելյալ փաստարկ էր այն հանգամանքը, որ Կենտրոնական եւ Արեւելյան Եվրոպայի երկրների ներկայացուցիչները, որոնք համալրել են ՆԱՏՕ-ի կազմը վերջին 1,5 տասնամյակի ընթացքում, երբեք նախկինում չեն ընտրվել դաշինքի բարձր պաշտոններում:
Ռազմական կոմիտեն ՆԱՏՕ-ի բարձրագույն մարմինն է, դրա կազմի մեջ են մտնում դաշինքի անդամ երկրների գլխավոր շտաբերի պետերը եւ Իսլանդիայի քաղաքացիական ներկայացուցիչը, քանի որ այն չունի զինված ուժեր, բայց ՆԱՏՕ-ի կազմում է:
Այս պահին ռազմական կոմիտեն նախագահում է դանիացի Քնութ Բարթելսը: Իր լիազորությունները չեխ գործընկերոջը նա կհանձնի հաջորդ տարվա սկզբին:
Բանակի գեներալ Պետր Պավելը 42 տարեկան է: Եվրոպական զինվորական շրջանակներում նա հայտնի է դարձել Հարավսլավիայի պատերազմի ընթացքում, երբ գնդակոծությունից փրկել է միջազգային կոնտինգենտի մոտ 40 ֆրանսիացի զինծառայողի:
