Իրանի գլխավոր դատախազությունը տեղեկատվական-հաղորդակցական տեխնոլոգիաների նախարարությունը հանձնարարել է արգելափակել Viber, Tango եւ WhatsApp սոցիալական ցանցերին հասանելիությունը: Իրանական Press-TV հեռուստաալիքի հաղորդմամբ, որոշման պատճառ է դարձել այն, որ դրանցով «նվաստացնող բովանդակությամբ տեղեկություն է տարածվել»:

Ըստ ԻՏԱՌ ՏԱՍՍ-ի, տեղեկատվական-հաղորդակցական տեխնոլոգիաների նախարարությանն ուղղված նամակում Իրանի գլխավոր դատախազ Ղոլեմ Հոսեյն Մոհսենի-Էջեին ընդգծել է, որ այդ սոցիալական ցանցերում «իսլամական եւ բարոյական արժեքները վիրավորող եւ անպարկեշտ բնույթի» նյութեր են տարածվել:

Գլխավոր դատախազը նաեւ մատնանշել է, որ այդ ցանցերում հայտնված որոշ նյութերի հետեւում «Իրանի Իսլամական Հանրապետությանը թշնամի օտարերկրյա կառավարական հաստատություններ են»:

Իրանցի պաշտոնյան նաեւ ընդգծել է, որ «եթե մեկ ամսվա ընթացքում իր պահանջը չկատարվի, ապա անհրաժեշտ միջոցառումներ կձեռնարկի անմիջականորեն երկրի դատական համակարգը»: