Ժողովրդավարական Հայրենիք կուսակցության քաղաքական խորհուրդը հայտարարություն է տարածել Շանթ Հարությունյանի գործի վերաբերյալ:
«2013 թ.-ի նոյեմբերի 5-ին Շանթ Հարությունյանի ու նրա ընկերների կազմակերպած անհնազանդության աղմկահարույց գործով ընթացող դատավարությունը մեզ բոլորիս վերադարձրեց 2008-2010 թթ քաղաքական դատավարություններին, ինչն ավելորդ անգամ փաստում է, որ վարչախմբի գործելաոճի մեջ ոչինչ չի փոխվել, առավելեւս մեղադրողի պահանջած պատժաչափերը` հատկապես Շանթի որդու մասով, ոչ այլ ինչ, քան քաղաքական վենդետա չես կարող բնութագրել:
Հարությունների գերդաստանը, լինելով բացառիկ հայրենասերներ, ինչն ապացուցում է Շանթն իր ապրած կյանքով, որն արտահայտվեց նաեւ իր եւ ընկերների գործողություններով, ինչը լուրջ ազդակ էր հասարակությանը, ընդդիմադիր քաղաքական ուժերին, որ այլեւս առանց քաղաքացիական անհնազանդության երկրում փոփոխություններ իրականացնելն անհնարին է:
Այս դատավարությամբ վարչախումբը փորձում է վախի մթնոլորտ սերմանել բոլոր նրանց համար, ովքեր Հայաստանում այլեւս անհնարին են համարում ընտրությունների միոցով հասնել իշխանափոխության, եւ այլ ուղիներ են առաջարկում իշխանությունը ժողովրդին վերադարձնելու հարցում:
Սակայն վարչախումբն ամեն գնով շարունակում է հասարակությանը հրամցնել իրենց հին ու փորձված «ընտրությունների» միջոցով իրականացնել իշխանափոխություն:
Շանթի ու ընկերների նկատմամբ իրականացվող դատական վենդետան եւս ծառայում է այդ նպատակին, ինչը բարեբախտաբար այլեւս չի գործելու, որովհետեեւ նրանց վառած կրակը դեռեւս երկար է ծխալու:
ԺՀԿ-ն դիմում է վարչախմբին սթափվել ու վերջ դնել դատավարություն կոչված ծաղր ու ծանակին եւ բոլոր տղաներին ազատ արձակել, որը կարելի կլինի ընկալել որպես առաջին փոքր քայլ իշխանությունը ժողովրդին հանձնելու գործընթացին»,- ասվում է հայտարարության մեջ:
