Հայաստանում ոչ իշխանական խորհրդարանական ուժերի քառյակի գործունեությունը հիմնականում վերահսկում են երկրորդ նախագահ Ռոբերտ Քոչարյանը եւ գործող նախագահ Սերժ Սարգսյանը: Նման միտք է արտահայտել «Ժողովրդավարական հայրենիք» կուսակցության նախագահ Պետրոս Մակեյանը սեպտեմբերի 22-ի մամուլի ասուլիսում:
Ըստ նրա՝ հայտնի է, որ «Բարգավաճ Հայաստան» կուսակցությունը ստեղծել է Քոչարյանը: «Ցավոք, ՀԱԿ-ի մեր նախկին համախոհները սպասարկում են «Բարգավաճ Հայաստանի» շահերը: Վերջին ժամանակներս պարզ դարձավ, որ «Ժառանգություն» կուսակցությունը կարծես թե նույնպես իր գործունեությունն իրականացնում է Քոչարյանի ստվերում: Հասկանալի չէ` ՀՅԴ-ն այսօր իշխանություն է, թե ընդիմություն», - նշել է Մակեյանը:
Ըստ նրա` ՀՅԴ-ն փորձում է խաղալ Սերժ Սարգսյանի եւ Ռոբերտ Քոչարյանի միջեւ: «Եթե խորհրդարանական եռյակում շարժիչ ուժը ԲՀԿ-ն է, ապա երկրում ոչ մի փոփոխություն տեղի չի ունենա», - ընդգծել է «Ժողովրդավարական հայրենիք» կուսակցության առաջնորդը: