Հուլիս-օգոստոս ամիսներին ղարաբաղյան հակամարտության գոտում շփման գծի միկրոպատերազմում Հայաստանը շահեկան դիրքում հայտնվեց՝ շնորհիվ մեր զինծառայողների ոգու եւ մարտունակության: Այդ մասին այսօր՝ սեպտեմբերի 22-ին, մամուլի ասուլիսին հայտարարեց «Ժողովրդավարական հայրենիք» կուսակցության ղեկավար Պետրոս Մակեյանը:
Նրա համոզմամբ՝ Ադրբեջանի նախագահ Իլհամ Ալիեւը չի համաձայնել Բաքվին Մաքսային միությանը, իսկ հետո նաեւ՝ Եվրասիական տնտեսական միությանը ներգրավելու Ռուսաստանի կողմից առաջարկված տարբերակին, այդ թվում՝ Հայաստանի կողմից զիջումների հաշվին: «Այդ զիջումները չբավարարեցին Ալիեւին եւ Պուտինը փորձեց պատժել նրան: Սոչիում կայացած եռակողմ հանդիպումը ցույց տվեց, որ Ալիեւը բավականին ճնշված վիճակում է», - ընդգծեց Պետրոս Մակեյանը:
Հիշեցնենք, որ Ռուսաստանի, Հայաստանի եւ Ադրբեջանի նախագահներ Վլադիմիր Պուտինի, Սերժ Սարգսյանի եւ Իլհամ Ալիեւի հանդիպումը տեղի է ունեցել օգոստոսի 10-ին՝ Սոչի քաղաքում: