Բաքվում կրկին սրվում են քաղաքային իշխանությունների եւ փախստականների միջեւ հարաբերությունները:
«Ազատություն» ռադիոկայանը հայտնում է, որ Ադրբեջանի մայրաքաղաքի իշխանությունները որոշել են քանդել Գանլըգել լճի շրջակայքում բնակվող փախստականների 350 տուն:
Քաղաքապետարանն ընտանիքներին բնակարաններ է հատկացրել Յասամալի թաղամասի նորակառույցներում եւ փախստականներից պահանջել 4 օրվա ընթացքում ազատել տները:
Սակայն 300-ից ավելի ընտանիքներ հրաժարվում են լքել տները՝ ասելով, որ իրենց առաջարկված բնակարանները ավելի փոքր մակերես ունեն: Փախստականները պահանջում են իրենց նաեւ փոխհատուցում վճարել:
Նշենք, որ փախստականների մասնակցությամբ տարբեր բողոքի ցույցերը սովորական երեւույթ են դարձել Բաքվի համար: Պարբերաբար բարձրանում է փախստականների վերաբնակեցման, նրանց խնդիրների նկատմամբ պաշտոնյաների անտարբերության հարցը: