«Բանդայի գործով» ամբաստանյալ Քյարամ Ամոյանը, ում գործը առանձնացվել է հիմնական գործից եւ քննությունը 6 ամսով երկարաձգվել է, սեպտեմբերի 21-ին տեղափոխվել է «Նուբարաշեն» հոգեբուժական կլինիկա: Այս մասին NEWS.am-ին ասաց մեղադրյալի փաստաբան Սամվել Հովհաննիսյանը:
Նրա խոսքով՝ Քյարամի վիճակն ավելի է վատացել, նա չի գիտակցում, թե որտեղ է գտնվում:
«Նոր փորձաքննություններ են նշանակվել, Քյարամի վիճակի մեջ ոչ մի դրական դինամիկա չկա, ավելին հիմա չի էլ հասկանում, թե իր հետ ինչ է կատարվել: Անընդհատ ասում է, որ շուտով տուն է գնալու»,- ասաց փաստաբանը:
Անդրադառնալով գործին՝ Սամվել Հովհաննիսյանն ընդգծեց, որ առայժմ 6 ամսով են հետաձգել, սակայն չի բացառվում, որ ժամկետը կերկարաձգեն
Նշենք, որ Քյարամ Ամոյանը առողջական լուրջ խնդիրներ ունի: Մայիսի 7-ին հաշվի առնելով դատաբժշկական փորձաքննության արդյունքները՝ Կենտրոն եւ Նորք Մարաշ ընդհանուր իրավասության դատարանը որոշեց Քյարամ Ամոյանի մասն առանձնացնել եւ 6 ամսով հետաձգել քննությունը:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցավորության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը եւ մյուսները մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար:
