Ամերիկյան Ափշավա ազգային պարկում արջը հոշոտել է 22-ամյա զբոսաշրջիկին։ Agence France-Presse-ի փոխանցմամբ, դեպքը կատարվել է Նյու Յորքից 65 կմ այն կողմ տեղակայված արգելոցում։
Հինգ հոգուց բաղկացած զբոսաշրջիկների խումբը անտառաշերտի երկայնքով շարժվում էր դեպի Վեսթ Միլֆորդ քաղաք (Նյու Ջերսի նահանգ), երբ նկատել են արջի։ «Մարդիկ խուճապահար տարբեր ուղղություններ են փախչել», — պատմել են ոստիկանությունում: Որոշ ժամանակ անց չորս հոգով հավաքվել են եւ ոստիկանություն կանչել, քանի որ չեն կարողացել գտնել իրենց ընկերոջը` Ռութգերսի համալսարանի ուսանող Դարշ Փաթելին, փոխանցում է New York Daily News-ը:
Որոնողափրկարարական ջոկատները երկու ժամ որոնումներից հետո հայտնաբերել են տղամարդու մարմինը: «Դեպքի վայրում ապացույցները հաստատել են, որ զբոսաշրջիկը 135 կգ-անոց արջի զոհի է դարձել: Արջին հայտնաբերել են, նրան անմիջապես քնեցրել են», — նշել են ոստիկանությունում, փոխանցում է Lenta.ru-ն: