Ամերիկյան կողմը ՄԱԿ-ում Սիրիայի մշտական ներկայացուցիչ Բաշար Ջաֆարիին իրազեկել է, որ սկսելու է այդ երկրի հյուսիսում «Իսլամական պետության» դիրքերին ավիահարվածներ հասցնել: Այս մասին ասված է Սիրիայի ԱԳՆ-ի հաղորդագրությունում, որը տարածել է պետական ՍԱՆԱ լրատվական գործակալությունը: Ներկայումս Սիրիայի պետական հեռուստատեսությամբ հեռուստամարաթոն է ընթանում, որի մասնակիցները շեշտում են, որ ԱՄՆ-ն եւ նրա դաշնակիցները, խախտելով երկրի ինքնիշխանությունն ու միջազգային իրավունքը, հարվածներ են հասցնում ահաբեկիչների դիրքերին, որոնց իրենք էին ամեն կերպ աջակցում:
Ավելի վաղ Պենտագոնի մամուլի քարտուղար Ջոն Քիրբին հայտարարել էր, որ հարվածներ հասցնելիս օգտագործվում են կործանիչներ, ռմբակոծիչներ: Ռուսաստանը քանիցս հայտարարել է, որ առանց պաշտոնական Դամասկոսի համաձայնության եւ ՄԱԿ-ի ԱԽ-ի թույլտվության հարվածներ հասցնելը հակասում է միջազգային իրավունքի նորմերին: