Ռուսաստանի, Ղազախստանի եւ Բելառուսի համար Հայաստանի անդամակցությունը Եվրասիական տնտեսական միությանն ունի ոչ թե տնտեսական, այլ քաղաքական նշանակություն: Այսօր` սեպտեմբերի 23-ին, լրագրողների հետ զրույցում այսպիսի կարծիք հայտնեց Ազգային ժողովի ԲՀԿ խմբակցության պատգամավոր Միքայել Մելքումյանը:
«Որեւէ տնտեսական շահեկան վեկտոր ես չեմ տեսնում: Ինչ վերաբերում է Հայաստանին, մեր երկիրը նախընտրեց անվտանգության երաշխիքը: Երեք տարի գնում էինք դեպի Եվրամիության, իսկ մեկ էլ հանկարծ փոխվեց մեր վեկտորը, եւ մենք գնացինք դեպի մեր ռազմավարական գործընկերոջ հետ դեպի Եվրասիական տնտեսական միություն: Տնտեսական առումով ես տեղեկություն չունեմ, որ մեզ համար կարեւոր նշանակություն ունեցող ապրանքների հարցը լուծվել է, չնայած կառավարությունն անընդհատ շեշտում է, որ այդ հարցը լուծված է»,- ասաց նա:
Նշենք, որ հոկտեմբերի 9-ին, Մինսկում քննարկվելու է ԵՏՄ-ին Հայաստանի միանալու հարցը, ամենայն հավանականությամբ Հայաստանը կստորագրի ԵՏՄ-ին միանալու պայմանագիրը: