Արարատում վիճաբանության արդյունքում վնասվածքներ ստացած երիտասարդին լուսադեմին վիրահատել են: Այս մասին NEWS.am-ի թղթակցի հետ զրույցում ասաց Արարատ բ/կ-ի ղեկավար Արայիկ Սարդարյանը:
Նա նշեց, որ Տիգրանին վիրահատել են բարակ աղի, ճարպոնի հատվածում,աղիներն են վերականգնել, այժմ վիճակը գնահատվում է կայուն՝ միջին ծանրության: Նա դեռ գտնվում է Վերակենդանացման բաժանմունքում: Ինչ վերաբերում է մահացած երիտասարդին՝ Խաչիկին, հիվանդանոցի տնօրենն ասաց, որ վնասվել էր նրա ազդրային զարկերակը եւ նրան արդեն մահացած են բերել հիվանդանոց:
Ավելի վաղ NEWS.am-ը հայտնել էր, որ Արարատում, սեպտեմբերի 22-ին, վիճաբանություն է տեղի ունեցել մի խումբ երիտասարդների միջեւ, որն ավարտվել է նրանցից մեկի մահով: Կռվի ընթացքում երկու 24-ամյա երիտասարդներ՝ Տիգրան եւ Խաչիկ անուններով, ստացել են ազդրերի ու որովայնի շրջանում կտրող ծակող վնասվածքներ:
NEWS.am-ի տեղեկություններով, նրանք տեղափոխվել են Արարատի հիվանդանոց եւ որոշ ժամանակ անց Խաչիկը, որի վնասվածքը ազդրին է եղել, մահացել է: Նրանց վնասվածք պատճառած անձինք դեպքի վայրից դիմել են փախուստի եւ մինչեւ հիմա չեն հայտնաբերվել:
Քննչական կոմիտեից NEWS.am-ի թղթակցին հայտնեցին, որ դեպքի առթիվ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 14-րդ կետի (դիտավորությամբ առողջությանը ծանր վնաս պատճառելը, որն անզգուշությամբ առաջացնելով տուժողի մահ, պատժվում է ազատազրկմամբ` 5-10 տարի ժամկետով):եւ 112-րդ հոդվածի 2-րդ մասի 1-ին կետի հատկանիշներով (երկու կամ ավելի անձանց նկատմամբ դիտավորությամբ առողջությանը ծանր վնաս պատճառելը):