Գորիսի բժշկական կենտրոնում հունիսի 23-ին մահացած նորածնի գործով նշանակված դատաբժշկական փորձաքննության արդյունքները դեռ հայտնի չեն, իսկ մեղադրվող մանկաբույժն էլ շարունակում է աշխատել իրենց մոտ: Այս մասին NEWS.am-ի հետ զրույցում ասաց հիվանդանոցի փոխտնօրեն Լեւոն Հարությունյանը:
«Աիդա Հարությունյանին բժշկական խորհուրդն ուղարկել է վերապատրաստման դասընթացների: 7 շաբաթ է տեւելու դասընթացը, որից հետո նա կշարունակի աշխատել մեզ մոտ: Ճիշտն ասած, Աիդա Հարությունյանը միշտ շատ լավ է աշխատել, լավ ցուցանիշներ է ունեցել, չենք ուզում իրեն կորցնել, որովհետեւ միակ մանկաբույժն է: Բացի դրանից՝ փորձաքննության պատասխաններն էլ դեռ չենք ստացել»,- ասաց փոխտնօրենը:
Նշենք, որ մահացած նորածնի մայրը՝ Սյուզի Այվազյանը NEWS.am-ին ասել էր, որ իր երեխայի մահվան մեջ մեղավոր է մանկաբույժը՝ Աիդա Հարությունյանը: Սյուզիի խոսքով՝ իրեն հիվանդանոցում չեն ասել, որ երեխան խնդիրներ ունի, ծնվելուց երկու օր անց՝ ամսի 23-ին, առավոտյան ժամը 06:15-ին, բուժքույրն իրենից տակդիր է ուզել, երեխան անհանգիստ է եղել, իրեն չեն թողել ներս մտնել, իսկ արդեն ժամը 07։00-ի մոտ ասել են, որ փոքրիկը մահացել է: Սյուզին վստահեցնում է, որ բուժքույրն է երեխային օգնություն ցուցաբերել, քանի որ մանկաբույժը հիվանդանոցում չի եղել:
