Թուրքիայի նոր դասագրքերում շարունակվում են հայերի հանդեպ թշնամանք հրահրող ձեւակերպումներ, որոնց հետ կապված Թուրքիայի ընդդիմադիր «Ժողովրդա-հանրապետական» (CHP) կուսակցության փոխնախագահ Սեզգին Թանրըքուլուն գրավոր հարցադրում է արել երկրի Կրթության նախարարին։
Թուրքական T24.com կայքի փոխանցմամբ՝ CHP-ի փոխնախագահ Սեզգին Թանրըքուլուն Թուրքիայի կրթության նախարար Նաբի Ավջըին ուղղված հարցադրման մեջ նշել է, թե տեղեկություններ կան, որ 8-րդ դասարանի դասագրքերում հայերը ներկայացվում են երկիրը բաժանողներ, թուրքերին ու մուսուլմաններին կոտորողներ եւ իրենց նպատակին հասնելու համար հորինել են ցեղասպանության մասին ստեր։
«Ճի՞շտ են այս պնդումները։ Եթե ճիշտ են, ապա հետաքննություն սկսվե՞լ է կամ սկսվելու է մեղավորներին պատժելու համար։ 8-րդ դասարանի դասագրքերում ազգային փոքրամասնությունների նկատմամբ թշնամություն հրահրող նյութերի հետ կապված ստուգումներ իրականացվո՞ւմ են»,-հարցրել է Սեզգին Թանրըքուլուն իր գրավոր հարցադրման մեջ։
Նշենք, որ վերջին օրերին տեղեկություններ էին հայտնվել, որ թուրքական դասագրքերում կրկին հայերի հանդեպ թշնամանք եւ ատելություն սերմանող ձեւակերպումներ կան։