Դաժան ծեծի ենթարկված Հրավարդ Սարգսյանի առողջական վիճակը ծայրահեղ ծանր է: Այս մասին NEWS.am-ի թղթակցի հետ զրույցում ասաց «Սուրբ Գրիգոր Լուսավորիչ» բ/կ-ի Վերակենդանացման բաժանմունքի ղեկավար Գագիկ Մանուկյանը:
Նա նշեց, որ հենց հիվանդանոց տեղափոխելու առաջին օրը նրան վիրահատել են, բայց Հրավարդ Սարգսյանը անգիտակից վիճակում է, միացված արհեստական շնչառության ապարատին:
«Ծայրահեղ ծանր վիճակ է, հեմատոմա են վիրահատել, արհեստական շնչառության տակ պահում ենք, տեսնենք ինչ կլինի»,-ասաց Գագիկ Մանուկյանը:
Ծովակի գյուղապետ Գարիկ Հակոբյանն էլ NEWS.am-ի թղթակցի հետ զրույցում ասաց, որ Հրավարդի ծեծի ենթարկված որդու՝ 15-ամյա Մանուկի վիճակը նորմալ է, նա հիվանդանոց չի տեղափոխել: Նա ունի նաեւ դպրոցահասակ դուստր: Գյուղապետն ասաց, որ խելոք, հանգիստ գյուղացի մարդիկ են, ովքեր ապրում են իրենց աշխատանքով: Իսկ նրանք, ովքեր ծեծի են ենթրակել հորն ու որդուն, իրար չեն ճանաչել, պարզապես ճանապարհին տեսել են եւ ինչ-որ ճանապարհ չզիջելու խնդիր է առաջացել:
Հիշեցնենք, որ Գեղարքունիքի մարզի Ծովակ գուղի բնակիչներնսեպտեմբերի 22-ին, ժամը 15-ի սահմաններում, փակել են Երեւան-Վարդենիս ավտոճանապարհի Ծովակ գյուղի հատվածը՝ ի պաշտպանություն գյուղի բնակիչներ հայր եւ որդի Հրավարդ եւ Մանուկ Սարգսյաննների, որոնց սեպտեմբերի 20-ին դաժանաբար ծեծի են ենթարկել:
Ըստ նախնական տեղեկությունները ծեծի պատճառը եղել է իրար ճանապարհ չզիջելը: Ծեծողները եղել են 3 հոգի՝ «ՎԱԶ-2105» մակնիշի մեքենայով:
Քրեական գործը հարուցվել է Քրեական օրենսգրքի 112-րդ հոդվածի 1-ին մասի հատկանիշներով (դիտավորությամբ առողջությանը ծանր վնաս պատճառելը): Ծովակցիներ հայր եւ որդի Հրավարդ եւ Մանուկ Սարգսյանններին ծեծի ենթարկելու մեջ կասկածվող 27-ամյա Հրանտ Շաբոյանը ձերբակալված է:Ձեռնարկվում են միջոցառումներ Մարտին Հ.-ին և Զոհրաբ Կ.-ին հայտնաբերելու ուղղությամբ: