Հյուսիսատլանտյան Դաշինքը պաշտպանում է ԵԱՀԿ Մինսկի խմբի ձեւաչափը եւ ղարաբաղյան հակամարտության խաղաղ կարգավորումը: Այդ մասին NEWS.am-ի թղթակցի հետ զրույցում հայտարարեց Հարավային Կովկասում ՆԱՏՕ-ի գրասենյակի ղեկավար, դեսպան Ուիլյամ Լահյուն՝ անդրադառնալով հարցին այն մասին, թե արդյոք ադրբեջանական կողմը փորձ կատարել է բարձրացնել ԵԱՀԿ Մինսկի խմբի ձեւաչափի փոփոխության անհրաժեշտության վերաբերյալ Ուելսում ՆԱՏՕ-ի գագաթաժողովի ընթացքում:
Ուիլյամ Լահյուի խոսքով՝ դա ադրբեջանական կողմի դիրքորոշումն է: «Խնդրի կարգավորման համար այլ ձեւաչափ գոյություն չունի: Մինսկի խումբը միակ ձեւարափն է եւ գոյություն ունեցող միակ առաջարկը, որն ուղղված է խնդրի կարգավորմանը: Ուստի ՆԱՏՕ-ն հետաքրքրված է, որպեսզի ԵԱՀԿ Մինսկի խումբը շարունակի իր գործունեությունը»,- նշեց Լահյուն: Քանի դեռ կողմերը չեն որոշել ինչ-որ այլ բան ձեռնարկել, ընդգծել է նա, սա այն է, ինչը ՆԱՏՕ-ն պաշտպանում է: «Հարկավոր է հիշեցնել, որ ՆԱՏՕ-ի առաքելությունը խնդիրների կարգավորումը չէ, այն պաշտպանական կազմակերպություն է: Այն համագործակցում է միջազգային այլ կազմակերպությունների հետ, որոնք մասնակցում են խնդիրների կարգավորման գործընթացներին»,- նշեց Ուիլյամ Լահյուն: Նա եւս մեկ անգամ ընդգծեց, որ Ադրբեջանն սրա վերաբերյալ իր դիրքորոշումն ունի, սակայն մինչ այժմ ԵԱՀԿ Մինսկի խմբին այլընտրանք չի գտնվել:
