ԱՄՆ-ի Կոնգրեսում հայկական հարցերի խմբի համանախագահ Ֆրենկ Փալոնեն դատապարտել է Դեր-էզ-Զորում հայկական եկեղեցու կործանումը: Այդ մասին հաղորդում է Ամերիկայի հայ դատի գրասենյակը:
«Ինձ խիստ վշտացնում ու զայրացնում է Դեր-էզ-Զորում Սուրբ Նահատակաների հայկական եկեղեցու կործանումը: Եկեղեցին կառուցել են հարյուր հազարավոր հայերի հիշատակին, ովքեր զոհվել են Դեր-էզ-Զորի ճանապարհին: Օսմանյան թուրքերի հրամանի համաձայն՝ հայ փախստականներին մահվան են ուղարկել Դեր-էզ-Զոր 20-րդ դարի առաջին ցեղասպանության ընթացքում»,- հայտարարել է նա:
Կոնգրեսականն ընդգծել է, որ միջազգային հանրությունը պետք է արձագանքի եկեղեցու կործանմանը, որը կառուցել են պատմության սարսափելի դրվագը հավերժացնելու համար: «Միացյալ Նահանգների կառավարությունը եւ տարածաշրջանում միջազգային այլ գործընկերներ պետք է ամեն ինչ անեն կրոնական փոքրամասնություններին պաշտպանելու եւ ապահովելու համար, որպեսզի հայ քրիստոնյաները նման սարսափելի արարքների թիրախ չդառնան»,- նշել է Փալոնեն:
Նրա խոսքով՝ Հայոց ցեղասպանության 100-ամյա տարելիցի մոտեցմամբ բոլորը պետք է հիշեն, որ իրենց պարտավորությունն է դեմ արտահայտվել ամբողջ աշխարհում հայերի նկատմամբ ամեն տեսակ հարձակումներին, ինչպես նաեւ կանխել հետագա նպատակաուղղված բռնությունը: