Մայր Աթոռ Ս. Էջմիածինը խստորեն դատապարտում է հայոց նվիրական սրբավայր հանդիսացող Դեյր էր Զորի Սրբոց Նահատակաց հայկական եկեղեցու պայթեցումը ահաբեկչական խմբավորումների կողմից:
Մայր Աթոռի տեղեկատվական համակարգի հայտարարության մեջ ասվում է. «Հայոց ցեղասպանության նահատակների մասունքներն ամփոփող եկեղեցու ավերումը անարգալից քայլ է հայ ժողովրդի եւ նրա սուրբ նահատակների հիշատակի հանդեպ:
Տեղի ունեցածն անթաքույց դրսեւորում է Հայոց ցեղասպանության 100-ամյա տարելիցի հիշատակության շրջանակներում հարվածելու հայ ժողովրդի պահանջատիրական արդար ձգտումներին: Կատարվածն անմարդկային բարբարոսություն է եւ չի կարող արդարացվել որեւէ կրոնի կամ գաղափարախոսության կողմից, որ հիմնված է աստվածպաշտական եւ մարդասիրական արժեքների վրա:
Հորդորում ենք մեր ժողովրդի զավակներին առավել ամրապնդվելու մեր նահատակների հանդեպ հարգանքի իրենց ուխտի մեջ եւ ի դերեւ հանելու չարագործների բոլոր դավադրությունները: Կոչ ենք ուղղում նաեւ միջազգային հանրությանը դատապարտել հիշյալ վայրագությունը` կանխելու համար նման ոճրագործությունների հնարավոր կրկնությունը»,-ասվում է հայտարարությունում: