ՀՀ նախագահի մեսիջը, թե լայն շրջանակներում քննարկվում է հայ-թուրքական արձանագրությունները խորհրդարանից հետ կանչելու հարցը, կայանում էր նրանում, որ Երեւանը Անկարայի ոչ մի նախապայման չի կատարի եւ այդ եղանակով Թուրքիայի հետ սահմանների բացման եւ դիվանագիտական հարաբերությունների հաստատման չի դիմի: Այս մասին NEWS.am-ի թղթակցին ասել է ԱԺ Պետաիրավական հարցերի հանձնաժողովի նախագահ, ՀՀԿ-ական պատգամավոր Հովհաննես Սահակյանը:
Ըստ նրա, երբ միջազգային հանրությունը պարտավորվեց երաշխավորել հայ-թուրքական արձանագրությունների կյանքի կոչումը եւ բացել փակ սահմանները, առաջին նախապայմանն այն էր, որ դա չպետք է տեղի ունենա Հայոց ցեղասպանությունը ճանաչելու կամ չճանաչելու հաշվին: «Մեր առաջնային խնդիրն է, որպեսզի միջազգային հանրությունը նկատի, որ 21-րդ դարում մենք ավելի բաց ենք մեր հարեւանների հետ շփման համար, հատկապես՝ Թուրքիայի, այն դեպքում, երբ հենց մենք պետք է նախապայման դնեինք, սակայն չարեցինք դա: Երկրորդ, մենք գիտենք, որ Թուրքիան Հայաստանի շրջափակում է իրականացնում դեռեւս 1993 – 94 թթ., որպեսզի թուլացնի մեզ տնտեսական տեսանկյունից: Մենք տեսանք, որ ճնշումը շատ էր, սակայն Թուրքիայի առաջ դրված հիմնական խնդիրը չիրականացավ», - ընդգծել է Սահակյանը: Նախագահի այն հայտարարությունը, թե լայն շրջանակներում քննարկվում է խորհրդարանից հայ-թուրքական արձանագրությունները հետ կանչելու վերաբերյալ հարցը, ըստ խորհրդարանականի համոզման, հերթական անգամ ապացուցում է, որ Հայաստանն ազնիվ է միջազգային հանրության հետ եւ կարող է կյանքի կոչել իր առջեւ դրված խնդիրները: «Մենք թույլ չենք տա նաեւ մոռանալ նախորդ դարի ամենասարսափելի հանցագործությունը: Այնպես որ, կարծում եմ՝ նախագահի ուղերձը տեղին է եւ հասցեագրված է միջազգային հանրությանը, որպեսզի այն էլ ավելի հետեւողական լինի», - ընդգծել է ՀՀԿ-ական պատգամավորը: