Երեւանի փողոցներում կայանած մեքենաների վրայից հանվում է «Վաճառվում է» գրությունը, քանի որ դա ապօրինի առեւտուր է: Այս մասին NEWS.am-ի թղթակցի հետ զրույցում ասաց Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը:
Նա նշեց, որ երբ մեքենաների վրա փակցնում են «Վաճառվում է» գրություն եւ կայանում փողոցներում, իսկ երբեմն՝ նույնիսկ մայթերին, դա ըստ էության վերածվում է վաճառակետի: «Կա ավտոմեքենաների վաճառքի վայր՝ ավտոշուկա, Երեւանի փողոցներում նման գրությամբ մեքենաների կայանելը ապօրինի առեւտուր է, այդ տարածքը վերածվում է վաճառքի կետի, այդ պատճառով էլ այդ գրությունները հանվում են»,-պարզաբանեց վարչության պետը:
Ավելի վաղ NEWS.am-ը հայտնել էր, որ Երեւանի քաղաքապետարանի եւ Ճանապարհային ոստիկանության աշխատակիցների համատեղ ուժերով քաղաքի վարչական շրջաններում իրականացվում են ավտոմեքենաների ապօրինի վաճառքը կանխելուն կամ դադարեցնելուն ուղղված միջոցառումներ:
Օգոստոսի 20-ից սեպտեմբերի 20-ն ընկած ժամանակահատվածում մի շարք ճանապարհահատվածներում կայանած ավտոմեքենաների ապակիներից հեռացվել է վաճառքի մասին գրառումներ պարունակող 180 հայտարարություն: Գործընթացին ներգրավված են նաեւ մայրաքաղաքի վարչական շրջանների առեւտրի, սպասարկումների եւ գովազդի բաժինները: Նույն ժամանակահատվածում մայթերին կայանած մեքենաների մասով Ճանապարհային ոստիկանության կողմից կազմվել է 19 վարչական արձանագրություն: Համատեղ շրջայցերը շարունակական բնույթ կկրեն: