Անշարժ գույքի կադաստրի պետական կոմիտեի՝ օգոստոսին բնակարանների գների մասին վերջերս հրապարակած տեղեկությունը գործնականում որեւէ նոր բան չէր պարունակում: Դատելով պաշտոնական տվյալներից՝ մայրաքաղաքի Կենտրոն վարչական շրջանում բնակարանների միջին արժեքն անցյալ տարվա ապրիլից մինչեւ այս տարվա օգոստոս մնացել է նույնը. 428 հազար դրամ՝ 1 քառակուսի մետրի դիմաց:
Տարեկան կտրվածքով մայրաքաղաքում բնակարանների միջին գների ամենամեծ աճն օգոստոսին արձանագրվել է ծայրամասային Նուբարաշենում. 2.5%: Հայտնի է, որ այդ շրջանում Երեւանի ամենաէժան բնակարաններն են, սակայն բնակարանային ֆոնդը բավական փոքր է: Այստեղ ընդամենը 37 բազմաբնակարան շենք կա (մայրաքաղաքում, ընդհանուր առմամբ, դրանց թիվն ավելի քան 4.800 է):
Նուբարաշենում բնակարանների միջին շուկայական գինը գրեթե 1.6 անգամ զիջել է մեկ այլ ծայրամասի՝ Մալաթիա-Սեբաստիայի ցուցանիշը, որը թանկացման վարկանիշում նախավերջին տեղում է:
Գների աճի տեմպով Նուբարաշենին հետեւել է Էրեբունին (0.8%-ով), այնուհետեւ մեկ այլ ծայրամաս՝ Նոր Նորքը (0.6%): Բացի Կենտրոնից, գներն անփոփոխ են մնացել նաեւ Արաբկիրում, որը բնակարանների թանկությամբ մայրաքաղաքում երկրորդ տեղն է զբաղեցնում:
Ելնելով պաշտոնական այս տվյալներից՝ կարելի է որոշակի եզրակացություն կատարել գնորդների պահանջարկի փոփոխության վերաբերյալ: Ներկայում միջին գնորդն այնքան էլ հարուստ չէ, որպեսզի բնակարան ձեռք բերի Երեւանի կենտրոնում, եւ նախընտրում է ծայրամասային, բայց ավելի հասանելի բնակարանը:
Առանձնատների առումով գների կայունությունը ցնցող է: Մեկ տարվա ընթացքում ստանդարտ առանձնատան միջին շուկայական գինն աճել է նույն Նուբարաշենում (խորհրդանշական 0.2%-ով) եւ Էրեբունիում (0.1%-ով): Մայրաքաղաքի վարչական այլ շրջաններում մեկ տարվա ընթացքում գները բացարձակ չեն փոխվել: Այդ ժամանակաշրջանում Հայաստանում ԱՄՆ դոլարի փոխարժեքը գրեթե չի փոխվել. 0.5%-ից էլ պակաս «թուլացել է»: Այնպես որ՝ այդ գործոնը չի ազդել դրամով արտահայտված բնակարանների գների վրա:
Հարկ է նկատել, որ այս ամենը տեղի է ունենում իրական սպառողական պահանջարկի կրճատման ֆոնին: Այսպես. օգոստոսին մայրաքաղաքում բնակարանների առքուվաճառքի գործարքների թիվը տարեկան կտրվածքով կրճատվել է 0.8%-ով, առանձնատների պարագայում՝ 20.7%-ով: Գաղտնիք չէ, որ երկրում բնակարանային շուկայի զարգացումը պահպանվում է ոչ թե առաջարկի ծավալով, այլ սահմանափակությամբ եւ գնորդների թվի դրական դինամիկայի բացակայությամբ: Այսինքն՝ վաճառողներն ավելի շատ են, քան գնորդները: