Մասաչուսեթսի Ուեսթոն քաղաքի Քեմբրիջյան դպրոցի Թոմփսոնի պատկերասրահում երեք մասից բաղկացած «Համբուրում եմ հողը» խորագրով ցուցահանդես է անցկացվում՝ նվիրված ժամանակակից հայ արվեստին: Այս մասին գրում է «Wicked Local Weston»-ը:
Ցուցահանդեսը կազմակերպվել է 1915 թվականի Հայոց ցեղասպանության 100-րդ տարելիցի առիթով: Պատկերասրահի տնօրեն եւ ցուցահանդեսի համակարգող Թոդ Բարթելի խոսքով, այս ցուցադրությունը կազմակերպել է, որպեսզի «ներկայացնի այդ հատուկ հարյուրամյակի ընթացքում հիշողության ուժը»:
«Շարքի անվանումը ծագում է հայկական ծիսակարգային «երկրպագություն» բառից, որը բառացիորեն թարգմանելիս նշանակում է «համբուրել հողը» եւ ջանքեր է ենթադրում: Այն նաեւ ենթադրում է հարգանք հողի, տան, երկրի, մարդկանց եւ կենսակերպի հանդեպ»,- նշել է Բարթելը:
Առաջին ցուցադրությունը, որը սկսվել է սեպտեմբերի 5-ին եւ տեւելու է մինչեւ նոյեմբերի 15-ը, նվիրված է Չիկագոյում բնակվող Գագիկ Հարությունյանի արվեստին: Նա կենտրոնացել է ինքնության, հիշողության եւ ընտանիքի փոխադրման հարցերի շուրջ:
Դեկտեմբերի 18-ից մինչեւ 2015 թվականի մարտի 13-ը կայանալիք երկրորդ ցուցադրության ժամանակ ներկայացվելու են Ուոթերթաունից Թալին Մեհերյանի աշխատանքները:
Իսկ այս շարքի երրորդ ցուցադրության ժամանակ, որը կայանալու է 2015թ. մարտի 30-ից հունիսի 13-ը, արվեստասեր հասարակությունը հնարավորություն կունենա ծանոթանալ տարբեր ուղղություններով աշխատող հայ նկարիչների հավաքածուներին:
