Հայաստանի Ազգային ժողովն այսօր՝ սեպտեմբերի 29-ի իր նիստն սկսել է «Ժառանգություն» խմբակցության պատգամավոր Զարուհի Փոստանջյանի հարցով, որը վերաբերել է հայ-թուրքական արձանագրություններին:
Նրա հարցին, թե ինչպիսին է լինելու հայ-թուրքական արձանագրությունների ճակատագիրը, Գալուստ Սահակյանը պատասխանել է. «Հերթական անգամ հնչում է հռետորական հարց: Հայաստանի նախագահ Սերժ Սարգսյանը ՄԱԿ-ի ամբիոնից արտահայտեց երկրի դիրքորոշումը հայ-թուրքական արձանագրությունների վերաբերյալ: Այդ հարցը գտնվում է երկրի նախագահի լիազորությունների ներքո»:
Հիշեցնենք, որ սեպտեմբերի 24-ին, հանդես գալով ՄԱԿ-ի գլխավոր ասամբլեիայի 69-րդ նստաշրջանում, ՀՀ նախագահ Սերժ Սարգսյանը հայտարարել է, որ Երեւանը լրջորեն քննարկում է հայ-թուրքական արձանագրությունները խորհրդարանից հետ կանչելու հարցը: