Մոսկվայի Տրոիցկի շրջանի դատարանի կողմից մեղավոր ճանաչված եւ 6 տարի 9 ամսվա բանտարկության դատապարտված Հրաչյա Հարությունյանի գործով տուժողները բողոքներ են ներկայացրել դատարան: Այս մասին NEWS.am-ի հետ զրույցում ասաց մարդու իրավունքների պաշտպանի խորհրդական Երանուհի Թումանյանցը:
ՄԻՊ խորհրդականի խոսքով՝ Հրաչյա Հարությունյանի փաստաբանն էլ դեռ չի ծանոթացել բողոքարկումներին, սակայն կարելի է ենթադրել, թե խոսքն ինչի մասին է. «Ենթադրում ենք, որ երկու մասով կարող է բողոքարկում լինի՝ կամ տուգանքների չափով, կամ էլ որ առաջին ատյանի դատարանը մերժել է մի քանի մլն ռուբլի փոխհատուցում պահանջող հայցը»:
Ինչ վերաբերվում է Հրաչյա Հարությունյանի առողջական վիճակին, Երանուհի Թումանյանցը հայտնեց, որ ամեն ինչ նորմալ է, նա ոչ մի բողոք չունի:
Նշենք, որ գործով տուժողները պահանջում էին մի քանի մլն ռուբլու փոխհատուցում, սակայն դատարանը վճռել էր, որ դրանք չպետք է քննվեն այս գործի շրջանակում, քանի որ քննության հետ չեն առնչվում:
Հիշեցնենք, որ ավտովթարը տեղի էր ունեցել 2013 թվականի հուլիսի 13-ին` Պոդոլսկի մոտակայքում: Հարությունյանի վարած «ԿամԱԶ»-ը բախվել էր ուղեւորափոխադրող ավտոբուսի, ինչի հետեւանքով մահացել էր 18 մարդ, վիրավորվել 60-ից ավելի մարդ: Քննությունը պարզել էր, որ բեռնատարի արգելակները վատ են աշխատել, եւ Հարությունյանը տեղյակ է եղել այդ մասին:
