Հյուսիսային պողոտայի մոտ, Տերյան 19 հասցեում գտնվող «Պաուլաներ» գարեջրատանը տեղի ունեցած սպանությունը չնչին կենցաղային վեճի արդյունք է: Այս մասին հայտնեցին NEWS.am-ի աղբյուրները:
Մեր տեղեկություններով՝ վիճաբանության հետեւանքով մահացողը գարեջրատան տնօրենն էր, իսկ վիրավորները՝ նրա ընկերները: NEWS.am-ի աղբյուրները հայտնեցին, որ ակումբի հարեւաններից մեկը իջել է եւ պահանջել, որ իջեցնեն երաժշտության ձայնը: Այս ընթացքում վիճաբանությանը մասնակցած անձանցից մեկի ձեռքը սուճի բաժակով վնասված է լինում եւ արյան կաթիլ է ընկնում այդ հարեւանի վրա: Վերջինս էլ վրդովվում է, թե էս ինչ եք անում ու դանակահարում տղամարդկանց: Ի դեպ, նախկինում մի քանի անգամ եւս նույն հարեւանը նույն խնդրով իջել է այդ գարեջրատուն: «Պաուլաներ» գարեջրատունը քաղաքակիրթ վայրի համբավ ունի, որտեղ այցելում են հասարակական, քաղաքական գործիչներ, արտասահմանից ժամանած հյուրեր:
Գարեջրատանը դանակահարած Ավետ Օհանջյանը մոտ 30 տարեկան է, հայրը մահացած է, մայրը առողջական խնդիրներ ունի, եղբայրն էլ աշխատում է հեռուստաընկերություններից մեկում: Նա նախկին որսորդ է, այժմ գտնվում է փախուստի մեջ:
Նշենք, որ սեպտեմբերի 27-ին «Նաիրի» բժշկական կենտրոնից ոստիկանության Կենտրոնականի բաժին ահազանգ է ստացվել, որ երկու քաղաքացի սուր կտրող-ծակող վնասվածքներով տեղափոխվել է իրենց մոտ:
Դեպքի վայր մեկնած օպերատիվ-քննչական խումբը պարզել է, որ ոմն Ավետ Օհանջանյանը իր մոտ եղած դանակով հարվածներ է հասցրել երեք անձանց՝ Սերգեյ Ս.-ին, Արման Փարսադանյանին եւ Արմեն Հարությունյանին: 58 թվականին ծնված Սերգեյ Ս.-ն վնասվածք է ստացել որովայնի շրջանում, իսկ 1975թ. ծնված Արման Փարսադանյանը վնասվածք էր ստացել կրծքավանդակի շրջանում: Նա, այսօր առավոտյան գիտակցության չգալով, մահացել է: Դեպքի կապակցությամբ հարուցվել է քրեական գործ՝ Քր.օր.-ի 104 (սպանություն» եւ 112 (Դիտավորությամբ առողջությանը ծանր վնաս պատճառելը) հոդվածների հատկանիշներով, ընթանում է քննություն: