Հայաստանում շատ հետաքրքիր իրավիճակ է ստեղծվել, իշխանության քայլերը տրամաբանությունից զուրկ են, իսկ ոչ իշխանական ուժերն էլ անհասկանալի է՝ ինչ են ուզում: Այս մասին NEWS.am-ի թղթակցի հետ զրույցում ասաց «Նոր ժամանակներ» կուսակցության ղեկավար Արամ Կարապետյանը:
Նա նշեց, որ իշխանափոխության կոչեր երկար ժամանակ լսում է նույն ուժերից, թե ՀԱԿ-ը, թե «Ժառանգությունը» երկար ժամանակ իր գործընկերներն են եղել, իսկ ԲՀԿ-ից նման կոչ երբեւէ չի լսել:
«Ինչքան երեւում է՝ տանող ուժը համարվում է ԲՀԿ-ն, որը ոչինչ չի ասում, եռյակը հիմնականում բողոքում է սահմանադրական փոփոխություններից, հիմնական թեման դա է: Եթե մենք չգիտենք՝ ինչ բարեփոխումներ են, ինչի՞ց բողոքենք, երբ նախագիծը կլինի, այդ ժամանակ պարզ կլինի՝ իշխանության նպատակը որն է, պետք է տեսնել, հետո բողոքել»,-ասաց նա:
Արամ Կարապետյանը շեշտեց, որ իշխանությունների բոլոր քայլերը զուրկ են տրամաբանությունից՝ թե Սերժ Սարգսյանի ելույթը ՄԱԿ-ի ամբիոնից, թե Սուրիկ Խաչատրյանի վերանշանակումը Սյունիքի մարզպետի պաշտոնին, թե «Շրջանառության հարկի» մասին օրենքը:
«Եռյակի այն կուսակցությունները, որոնք միշտ ասել են իշխանափոխություն, հիմա էլ են ասում, իսկ ԲՀԿ-ն ոնց եղել է այլընտրանք, այդպես էլ մնացել է: Մարտի 1-ին նրանք դեմ էին իշխանափոխությանը եւ փողոցում եղած մարդկանց համարյա անվանում էին տեռորիստներ: Եթե արտաքին զարգացումներն ընթանան այնպես, ինչպես այժմ, ապա որեւէ կտրուկ փոփոխություն մեր երկրում չի սպասվում»,-ասաց «Նոր ժամանակների» առաջնորդը:
