Ռուսաստանը Թուրքիային միջուկային էներգետիկայի ոլորտում 22 մլրդ դոլարի չափով ներդրումներ է առաջարկելու, եւ երկրներն ամրապնդելու են տնտեսական համագործակցությունը՝ չնայած տարածաշրջանային քաղաքականության հարցերում հայացքների տարբերություններին: Hurriyet Daily News-ի փոխանցմամբ՝ այս մասին սեպտեմբերի 29-ին հայտարարել է Թուրքիայի էներգետիկայի նախարար Թաներ Յըլդըզը:
Ստամբուլում ելույթ ունենալով «Ռեսուրսների ապաարգելափակում՝ տարածաշրջանային զարգացման համար» թեմայով Համաշխարհային տնտեսական ֆորումի հատուկ հանդիպման ժամանակ՝ թուրք նախարարը նշել է, որ սեպտեմբերի 30-ին այցելելու է Մոսկվա՝ քննարկելու Թուրքիայում Ռուսաստանի տնտեսական ներդրումների հարցը:
«Չնայած Մերձավոր Արեւելքում, օրինակ՝ Սիրիայում քաղաքական ճգնաժամի հետ կապված Թուրքիայի եւ Ռուսաստանի տարբեր մոտեցումներին, փոխադարձ կախվածությունն առաջնահերթություն է, եւ Թուրքիայում Ռուսաստանի տնտեսական ներդրումները կազմելու են 22 մլրդ դոլար՝ ներառյալ ատոմային էլեկտրակայանի կառուցումը»,- ընդգծել է Թաներ Յըլդըզը:
